Mehmûdî Hemey Leylê
قژکاڵی لێوئاڵی پرشنگی نیگاکاڵ! ئەی کچە جوانەکەی سەرگۆنا نەختێ ئاڵ! ئەی کچە مەنگەکەی بە دەنگی چپە دوو! گەندەمووی دەموچاو، مەچەک هەڵنەگرتوو! ئەی ئەندام وردیلەی نەرمۆڵەی ئێسکسووک! ئەی بەرگی ساکارت دڵگیرتر لە هی بووک! قژکاڵی لێوئاڵی پرشنگی نیگاکاڵ! ئەی کچە جوانەکەی سەرگۆنا نەختێ ئاڵ! ڕاستە من ڕێبوارم، سەرپێیی ئەڕوانم بەڵام وا جوانیی تۆ کاری کرد لە گیانم ئەڵێی نەک هەر ئێستا عومرێکی درێژە بەو دەست و پەنجانەت برینم ساڕێژە! قژکاڵی لێوئاڵی پرشنگی نیگاکاڵ! ئەی کچە جوانەکەی سەرگۆنا نەختێ ئاڵ! لە هەموو ئاسمانا ئەستێرەی بەربەیان! ئەخاتە دڵی من هەستێکی سپی و جوان! لە تەختێک هەڵئەستێ هەزار و یەک نەغمە: لە هەمووان* شیرینتر دێتە گوێم زۆر نزمە! قژکاڵی لێوئاڵی پرشنگی نیگاکاڵ! ئەی کچە جوانەکەی سەرگۆنا نەختێ ئاڵ! ئەی کچە کاڵەکە! جوانی تر با زۆر بن لە باغچەی بەهارا گوڵباخی بەر خۆر بن با ڕەنگیان پەرداخت بێ و جێگەیان سەرچڵ بێ بە واتەی خەڵکی تر با ناویان شاگوڵ بێ گیانی من بۆ تەڵێ وەنەوشە پەرۆشە کە لە ژێر سێبەری تووتڕکا خامۆشە! قژکاڵی لێوئاڵی پرشنگی نیگاکاڵ! ئەی کچە جوانەکەی سەرگۆنا نەختێ ئاڵ! کانییەکی ڕوونی بەر تریفەی مانگەشەو: لە بنیا بلەرزێ مرواریی زیخ و چەو جوانترە لە لای من لە دەریای بێ سنوور شەپۆلی باتە بەر تیژگی ڕۆژ شڵپ و هووڕ! قژکاڵی لێوئاڵی پرشنگی نیگاکاڵ! ئەی کچە جوانەکەی سەرگۆنا نەختێ ئاڵ!
Qijkalî lêw'alî pirşingî nîgakal! Ey kiçe cwanekey sergona nextê al! Ey kiçe mengekey be dengî çipe dû! Gendemûy demuçaw, meçek helnegirtû! Ey endam wirdîley nermoley êskisûk! Ey bergî sakarit dilgîrtir le hî bûk! Qijkalî lêw'alî pirşingî nîgakal! Ey kiçe cwanekey sergona nextê al! Raste min rêbwarim, serpêyî erwanim Belam wa cwanîy to karî kird le gyanim Elêy nek her êsta umrêkî dirêje Bew dest û pencanet birînim sarêje! Qijkalî lêw'alî pirşingî nîgakal! Ey kiçe cwanekey sergona nextê al! Le hemû asmana estêrey berbeyan! Exate dilî min hestêkî sipî û cwan! Le textêk helestê hezar û yek nexme: Le hemuwan* şîrîntir dête gwêm zor nizme! Qijkalî lêw'alî pirşingî nîgakal! Ey kiçe cwanekey sergona nextê al! Ey kiçe kaleke! cwanî tir ba zor bin Le baxçey behara gulbaxî ber xor bin Ba rengyan perdaxt bê û cêgeyan serçil bê Be watey xelkî tir ba nawyan şagul bê Gyanî min bo telê wenewşe peroşe Ke le jêr sêberî tûtrika xamoşe! Qijkalî lêw'alî pirşingî nîgakal! Ey kiçe cwanekey sergona nextê al! Kanîyekî rûnî ber tirîfey mangeşew: Le binya bilerzê mirwarîy zîx û çew Cwantire le lay min le deryay bê sinûr Şepolî bate ber tîjgî roj şilp û hûr! Qijkalî lêw'alî pirşingî nîgakal! Ey kiçe cwanekey sergona nextê al!