کوڕم* مەگری، هەنیسکی نیوەشەو بەس هەڵدە، بەس بگری! لە چاوی بێقەرارم بۆ دەرمانی وەنەوز ئەبڕی؟ کوڕی خۆم! کۆرپەلەم! میوانی دنیای تازە خوڵقاوم! ئەدا گریەت ئازار و ژان بە* ڕۆحی پڕ گلاراوم! چییە ئەم گریە بێ غایە، کڕووزەی نیوەشەو خورپێن؟ چییە ئەم قەترە وردانەی لە چاوت بێ مەئال ئەڕژێن؟ وەکو ئەو بەرخە بچکۆلەی کە هەر ئێستا لە دایک بوو لەبەر چی نەشئەیی یاری هەڵت ناداتە سەر پاشوو؟ چییە توخوا؟ چ سیڕڕێکە وەها مەحکوومی گریانی کە تۆ هێشتا لە خەم ناگەی؟ لە مانای گریە نازانی؟ ز ئەگەر وەک باوکە حەسرەت دیدەکەت زەهرت بچێژایە زەمان گەردی ئەمەلتی گشت بە دەم باوە بپێژایە حەقت بوو بێوچان بگری بەسەر تاوانی باوکیما بەحر پڕکەی لە تف، بیدەی بە ناوچاوانی باوکیما! وەلێ کۆچی ژیان کۆچێکی پڕ سحر و پڕ ئەفسوونە: لە یەک سەرچاوە دوو قەترە: یەکێ لێڵە و یەکێ ڕوونە! هەیە وەک من بەسەر دڕکا ئەنێ هەنگاوی ئاوارە هەیە هیی واش کە فەرشی ژێری پێی ئاوریشمی گوڵزارە! بە خۆڕایی مەترسە، خەم مەخۆ، مەگری لە ئێستاوە! بە چی مەعلووم کە چی لەو تەختی ناوچاوانە نووسراوە؟
Kurim* megrî, henîskî nîweşew bes helde, bes bigrî! Le çawî bêqerarim bo dermanî wenewz ebrî? Kurî xom! korpelem! mîwanî dinyay taze xulqawim! Eda giryet azar û jan be* rohî pir gilarawim! Çîye em girye bê xaye, kirûzey nîweşew xurpên? Çîye em qetre wirdaney le çawit bê me'al erjên? Weku ew berxe biçkoley ke her êsta le dayk bû Leber çî neşeyî yarî helt nadate ser paşû? Çîye tuxwa? çi sîrrêke weha mehkûmî giryanî Ke to hêşta le xem nagey? le manay girye nazanî? Z Eger wek bawke hesret dîdeket zehirit biçêjaye Zeman gerdî emeltî gişt be dem bawe bipêjaye Heqit bû bêwçan bigrî beser tawanî bawkîma Behir pirkey le tif, bîdey be nawçawanî bawkîma! Welê koçî jyan koçêkî pir sihir û pir efsûne: Le yek serçawe dû qetre: yekê lêle û yekê rûne! Heye wek min beser dirka enê hengawî aware Heye hîy waş ke ferşî jêrî pêy awrîşmî gulzare! Be xorayî metirse, xem mexo, megrî le êstawe! Be çî me'lûm ke çî lew textî nawçawane nûsrawe?
Saman Omer