Awaregey bîçaregey bî xanimanim Ermenî
Malid niyezanim ha le kû rûh û rewanim Ermenî
Şîrîn zwanim Ermenî derdid we giyanim Ermenî
Tirsim we gerdim ta nekey bwîşî biçû der wa nekey
Imca mi dî dîwanegey agir we giyanim Ermenî
To bew musulmanî bike î gewre mêhmanî bike
Herçî ke xwed zanî bike, min natewanim Ermenî
Bîxud era tirsî? Xwemim, qurse demim, xatircemim
Mangeşewe, sayey xweme, ha şan we şanim Ermenî
Newîş ew qere “çiştî nîye”, der wa ke barim keftîye
Her yey çikey nezrî bike, ter bû zwanim Ermenî
Er yey kesî le duşmenî pirsî ye le kûre senî?
We giyan herçî kafire iwîşim niyezanim Ermenî
Le xuse agir girdime rî malidan gum kirdime
Er mirdimîşem, mirdime, miştî suqanim Ermenî
Piştim le barê derd û xem şikya, niyezanim çe bikem
Derdim yese le malê xwem bî xanimanim Ermenî
Ruj û şewm cûr yeke, der wa ke naumîdim neke
Axe we naşer, taze mi cayel ciwanim Ermenî
Der wa ke zwîtir Pertewim, mêhmanegey axirşewim
Yey şîşe lew bedmesewe pir ke bizanim Ermenî
Er yey kesî le duşmenî pirsî ye le kûre senî?
We giyan herçî kafire iwîşim niyezanim Ermenî