من و دڵ

ڕۆژێ من و دڵ بولبولی دڵ شادی چەمەن بووین
هاوڕازی گوڵی گوڵشەن و نەسرین و سەمەن بووین
ئاسکی لە خەم ئازادی دەر و دەشت و دەمەن بووین
فارغ لە جەفای ڕاوچی و لە داو و کەمەند بووین
ئێستا کە بەبێ ڕەونەق و ژاکاوە دڵی من
ئێستا کە بەبێ ڕەونەق و ژاکاوە دڵی من
لەو ڕۆژەوە ڕۆیشتووە تۆراوە دڵی من
هەرچەند دەگەڕێم بێ سەر و شوێن ماوە دڵی من

کوا جیلوەیی گوڵ کوانێ سەفا و ڕەونەقی گوڵزار
کوا دیمەنی پڕ نەخش و نیگاری کەژ و کۆسار
کوا مەستی و کوا بادە و کوا شادییەکەی پار
کوا نەرگسی شەهلا و دوو چاوی ڕەشی دڵدار
کەی شەوق و سەفا و شادییەکەی ماوە دڵی من
کەی شەوق و سەفا و شادییەکەی ماوە دڵی من
لەو ڕۆژەوە ڕۆیشتووە تۆراوە دڵی من
هەرچەند دەگەڕێم بێ سەر و شوێن ماوە دڵی من