چارەی خەمی من مەی نییە مەیخانە بڵێ چی
بەو دەردەوە مەی نامگرێ پەیمانە بڵێ چی
پێم وا نییە لەم غەدرەوە فریام بکەوێ کەس
ئەو دۆست بوو وەفای بۆم نەبوو بێگانە بڵێ چی
گیانە بۆ مەی نییە ساقی کە پەنا دێنمە ئێرە
هەرکەس بە شەرابی خەمی جانانەیی تێرە
هەر عاشقە سووچیشی نەبێ دەیخەنە ئەستۆی
شەم ئاگری کردۆتەوە پەروانە بڵێ چی
تاوانی منە دەربەدری و دەردیسەری من
مەل خۆی سەری خۆی هەڵگرێ هێلانە بڵێ چی