دەردی دەروون ٢

نازانم دنیا ڕۆژە یا شەوە
هەموو کارێکم خواردن و خەوە
لە دەنگوباسی خەڵک بێ خەبەر
وەک مردوو ئەژیم دوورم لە بەشەر
خەریکی چ بم غەیری خواردنەوە
باسی قومار و پارە و بردنەوە
حەقمە لێم گەڕێ تانەم لێ مەدە
حەقێکی ئەتۆ لە سەدا سەدە
چیتر ئەزانی؟ وازم لێ بێنە
پەردەی ئەسرارم زۆر پێ مەدڕێنە
قسەم زۆر ماوە ڕەقە وەک بەردە
کاکە لێم گەڕێ بەرۆکم بەردە

مردم ئەوەندە حەول و چەنەم دا
هەرچێکی نووسیم گشتی چوو بەبا
قەومێکی دائیم هەر حەول بدەن
بۆ ئەوەی یەکتر بە عەرزدا بدەن
خۆم لە تەنقیدات دوور خستۆتەوە
هەواڵی دنیام لەبیر چۆتەوە
نازانم دنیا ڕۆژە یا شەوە
هەموو کارێکم خواردن و خەوە
چیتر ئەزانی وازم لێ بێنە
پەردەی ئەسرارم زۆر پێ مەدڕێنە
قسەم زۆر ماوە ڕەقە وەک بەردە
کاکە لێم گەڕێ بەرۆکم بەردە

تەنقید: ڕەخنە