هەی باز بەرز سەرکەشەیل لەی ناو گڵاڵەیلە چوە کەید؟
کەس لەێرە هاوبازد نیە لێی ناو مڵاڵەیلە چوە کەید؟
یەی جارتر باڵەو بگر شەیو واڵ ئەورەگان بدڕ
داڵاوخوەری وە پید نیەتێد لەی ناو داڵەیلە چوە کەید؟
قیژەی بکە تا سڵم شەو بشکی لەناو مانگەشەو
بەو بەر وە گورگ شەو بخە لەی ناو خەزاڵەیلە چوە کەید؟
حەێفد نیەکەن ک یەی قڵای گەزگەز ئەڕاد باڵا بکەێد
یانە بڕی زیقاوخوەن، لەی ناو چەتاڵەیلە چوە کەید؟
هۊچ کەس لەوای ت پی نیەتێد، دی بۊدەسە پەن وڵات
هەی کەێخوداگەی ئاسمان لەی ناو گەناڵەیلە چوە کەید؟
کوورکوورەکەیل دزمەوەر دەسد لە کەوکەوین بڕین
برق چەود چۊ بێنزە، لەی بەرقەچاڵەیلە چوە کەید؟
بەو تا بچیم تا ئاسمان تا بان تەخت ئەورەگان
ئێ خاکە دی ئاخرشەڕە، لەی وشکەساڵەیلە چوە کەید؟