گەرچی بەفری زەمانە داویەتە سەر و ڕیشم
ئێستاش بە یادی جاران لەسەر ڕێت دائەنیشم
خۆر ئاوا دەبێ و نایەی دڵم هەر چاو لە ڕێیە
لە ڕێبواران ئەپرسم کێ هەواڵی تۆی پێیە
پێم دەڵێن هەرزەگۆیان خۆڕی عەشقت ئاوا بوو
دانیشتنی ئەم ڕێیەت بێهوودە کردووە بە خوو
گەردی زەمانە ناگرێ شووشەی پەنجەرەی عەشقم
زامی بێ تۆییم سەختە بۆیە وا گەرمە ئەشکم
خەونی ڕۆژانی لاویم خۆزگەی ساڵانی پیریم
هەمووی هەر باسی تۆیە دەفتەری یادەوەریم
گەرچی بەفری زەمانە داویەتە سەر و ڕیشم
ئێستاش بە یادی جاران لەسەر ڕێت دائەنیشم