هاوڕێیان

من دەروازەی ماڵەکەمان ماچ ئەکەم کە گەڕامەوە
چونکە ساتێ ئەمدا لە زەنگ تۆ دەرگات لێ ئەکردمەوە
ڕێی غەریبانە ئەو ڕێیە ڕێی غەریبانە ئەو ڕێیە
ئەمێستا کە لە دووریی تۆ ئەو لانەیە بووەتە کابەم
ئای تامەزرۆم تۆ لەو دیوی دەرگا بی و لە دەرگا بەم
ڕێی غەریبانە ئەو ڕێیە ڕێی غەریبانە ئەو ڕێیە

تەنیا ڕێ ئەکەم ڕێ تەمتومانە
جەستەم لێرەیە ڕوحم لاتانە
لە ئێوەم ناکا ئەم دابڕانە
تەکیە و خانەقام هەر نیشتیمانە
هۆ هۆ هاوڕێیان ئەی هاوڕێیان
لە دووری ئێوە ئەستەمە ژیان

هاوڕێیان ئێوەش دووریتان داخە
تاسەی دیدارتان هاواری ناخە
چەن ڕۆژان بڕوا لە یادم ناچن
لە هەر کوێیە بن شایستەی ماچن
هۆ هۆ هاوڕێیان ئەی هاوڕێیان
لە دووری ئێوە ئەستەمە ژیان

پەشیمانم کە هاتمە دەر دەرگای بەهەشت بوو ئەو دەرگا
بۆ کێی باس کەم دەرد و کەسەر لێرە دەنگم بە کێ ئەگا
ڕێی غەریبانە ئەو ڕێیە ڕێی غەریبانە ئەو ڕێیە
چاوەڕوانی بەخشینتانم هەزار تۆبە وەکوو ئادەم
زەڕڕەیەک خاکی نیشتیمان بە قەسری قەیسەری نادەم