چ حەیفا نم نمێو وارۆ دڵێ و هاڵی جە زامت بۆ
ئەگەر دەردێت نەبا بەشکەم دەمی پایێز حەرامت بۆ!
خەزان و ئی تەم و هەورێ و بوەو خاکی و کەمێو واران
چەنی ڕۆحی مەبا تێکەڵ، مەگەر دێوانە فامت بۆ
جیایی ئا گەڵا زەردا دەسیشا وەر بیێ و مەردێ
نێشانە و حەزەرەتوو کۆچین ڕوێو مشیۆ بە نامت بۆ
سەر و سینە و گەڵا زەرڎا بە شادی پا نیای کوفرا
خەزان بەزمی خەمین وازۆ، ئەگەر زەڕێو مەرامت بۆ
خەمی تەسکین دەرا پاییز، مشۆ تۆشە و خەمیت پەڕ بۆ
خشە و دەنگ و گەڵا زەرڎا ملودی بێ کەلامت بۆ
ملۆ بەزموو خەزانی هەم جە زمسانی وەهارێو مەی
وەشا پێسە و جەسە و باخی وەروو وایە و دەوامت بۆ
شەوێ کەم کەم درێژێ با و خەمێوی ئاشنا مەیوە
زەروورا پەی شفا و حاڵی شەرابی تاڵەتامت بۆ