نێوان مانگی بەهاران وەختی خێڵ بەرەوژووران
لە هاڕەی ئاوهەڵدێڕی کوێستانی سەرسنووران
ورشەی بازنە و پاوانە، خرمە گوارە و بەرمووران
قاقای کیژە عێلاتییان لە نێو گوڵاڵەسووران
ئەرێ دەبارێ هەی دەبارێ دەبارێ کڕێوەی دەکا
لەسەر سینگی چاوجوانێ هەر خاڵ بانگی خاڵ دەکا
گیانە کاغەزێک بێنە هاوار وەسیەت دەنووسم
جوانێ دەردم زۆر سەختە گیانە لە گیان مەئیووسم
تاکوو نەمردووم بێنە جوانێ کوڵمەت ڕامووسم
ئەرێ دەبارێ هەی دەبارێ دەبارێ بەفر و باران
تاو لە کوڵمانی نادا لەبەر سێبەری گواران
ئەرێ عەمر و چاوەکەم یارە زێڕی هەژدە عەیارە
گەلی دۆست و برادەران تەگبیر بکەن لەو کارە
بابی زیندانی کردووە دەورەی سیمی خاردارە
ناوێرێ بێتە ژوانی پۆست و قەرەوڵ دیارە
ئەرێ دەبارێ هەی دەبارێ دەبارێ کڕێوەی دەکا
لەسەر سینگی چاوجوانێ هەر خاڵ بانگی خاڵ دەکا