چاوەکانت بێدەنگ ئەدوێن
نیگا ئەکەن زۆر شت ئەڵێن
ئەوەی بە دەم نایدرکێنی
ئەوەی لات بووەتە نهێنی
هەر کاتێ سەرنجیان ئەدەم
ئاشکرا لێیان تێ ئەگەم
چاوەکانت جووتێ خۆرن
وان بە ئاسمانی دڵەوە
سروشت تیشکی لێ دزیون
وا بە ڕوومەتی گوڵەوە
گوڵیش بۆیە پێکەنیوە
خەندەی لە لێوت دزیوە
چاوەکانت جووتێ چران
بۆ ڕووناکیی ڕێم هەڵکران
لە ڕێی سەختی بەرەو ژوورا
بە شوێن هیوای بەرز و دوورا
نیگاکانت وزە و تینمە
تێشووی سەفەری ژینمە