ئەرێ گۆزەی سوور و ئاوی ساردە
هەی وەرە لانکێ
چاوم لێ کە مانگی چاردە
دولبەرەی سووکەڵەی تەسکەڵەی دایکێ
ئەرێ لە ژێرڕا هات دوورم ناسی
هەی وەرە لانکێ
مەمکی خڕە وەک گێلاسی
ئەی وەرە لانکێ
لە تایفەی شا عەباسی
ئەی وەرە لانکێ
منداڵکارە و بۆ نامناسی
دولبەرەی دایکی
ئەرێ چاوی شین و زولفی ئاڵە
هەی وەرە لانکێ
دەڵێی ماینێ شێخەزاڵە
ئەی وەرە لانکێ
ماچێکی بۆ من حەڵاڵە
دولبەرەی تەسکەڵەی سووکەڵەی دایکێ
ئەرێ چاوت ڕەشە و بە خومارەوە
ئەی وەرە لانکێ
مەمکت سێوە و بە دارەوە
هەی وەرە لانکێ
جا خودا داویە و مەیشارەوە
دولبەرەی دایکێ
لە ژێرڕا هات دەڵێی بایە
هەی وەرە لانکێ
گوارەی زێڕی دە گوێی دایە
ئەی وەرە لانکێ
دەڵێی خەڵفی بێگەڵایە
دولبەرەی سووکەڵەی تەسکەڵەی دایکێ
ئەرێ لە ژێرڕا هات خۆ شل و شەوی
هەی وەرە لانکێ
وام کرد ئەو بەندە ڕێک کەوی
ئەی وەرە لانکێ
لە حەیفت چاوم پێ کەوی
دولبەرەی دایکێ
ئەرێ گۆزەی هەڵگرت جەڕەی دانا
هەی وەرە لانکێ
هەڵیگرتووە سەتڵ و شانە
ئەی وەرە لانکێ
شێت بووم بۆ ئەو چاوە جوانە
دولبەرەی دایکێ
وەک ئەتو بووم بە دێوانە
تاقانەی سووکەڵەی دایکێ
ئەرێ گۆزەی سوورە و ئاوی ساردە
هەی وەرە لانکێ
چارشەوێکەت بۆ من لادە
ئەی وەرە لانکێ
بەجێی هێشتووم مانگی چاردە
دولبەرەی دایکێ
ئەرێ لانکۆڵەکەی دارە تووە
ئەی وەرە لانکێ
سەر لانکەکەی لە دوو ڕووە
ئەی وەرە لانکێ
نانوێ بە ڕۆژ زۆر نوستووە
دولبەرەی دایکێ
ئەرێ لانکۆڵەکەی دارە گوێزە
ئەی وەرە لانکێ
سەر لانکەی پارچەی تەورێزە
ئەی وەرە لانکێ
غەوسولعەزەم بیپارێزە
دولبەرەی دایکێ