بە دەربەدەری یان لە ماڵی خۆم
لە خاکی عەڕەب، لە عێران و ڕۆم
کۆک و پۆشتە بم، ڕووت و ڕەجاڵ بم
کۆشکم دە قات بێ، وێرانەماڵ بم
ئازا و ڕزگار بم ئازیز شادان و خەندان
یان زنجیر لە مل لە کووچی* زیندان
کوردم و لەڕێی کورد و کوردستان
سەر لە پێناوم گیان لەسەر دەستان
بە کوردی دەژیم بە کوردی دەمرم
بە کوردیش ئەدەم وڵامی قەبرم
بە دەربەدەری یان لە ماڵی خۆم
لە خاکی عەڕەب، لە عێران و ڕۆم
ساغ بم جحێڵ بم بگرم گۆیسۆنان*
یان زار و نزار لە نەخۆشخانان
دانیشم لەسەر تەختی خونکاری
یان لە کۆڵانان بکەم هەژاری
کوردم و لەڕێی کورد و کوردستان
سەر لە پێناوم گیان لەسەر دەستان
بە کوردی دەژیم بە کوردی دەمرم
بە کوردیش ئەدەم وڵامی قەبرم
بە کوردی دیسان زیندوو دەبمەوە
لەو دنیایەش بۆ کورد تێ هەڵدەچمەوە