ئەی وەتەن با ئاگردانی زاماری بەر بارانیش بم
با قەیاغی هەڵگەڕاوی نیوەشەوی تۆفانیش بم
لە ڕێتا ئاگرێکم هەر دووکەڵاوی مەرگم نییە
بەسەر کێوی داخا ئەڕۆم کزە و ترسی جەرگم نییە
سوێند بە ناوت هەر پێشمەرگە تاقانەکەی جارانی تۆم
هەر ئاوێنە هەتاودیدەی قەیوانەکەی جارانی تۆم
لێت نەشێوێ ڕێ پەشێوێ بڵێ مەیلی ئەوسای نییە
هەڵزنینێ ڕاچەنینێ تاوێ سەدای ئەوسای ئەوسای نییە
لە بیرت بێ ئەی وەتەن من ئافاتی شەڕ نەیبەزاندم
وەک ئەسپەکەی با و بۆران بم هیچ بۆرانێ نەیبەزاندم
ئەمێستاکەش ئەی کوردستان سوێند بە بەفری قەندیلەکەت
سوێند بە نەغمەی ئاڵەنەغمەی تەیرە مەست و خۆشخوانەکەت
هەر وەک ئەوسا هەتا مردن بەردەبازی ڕێگات ئەبم
بەرتەڵان و هەر پەرژینی بەرهەیوانی دەرگات ئەبم
تۆش نەکەی نا، دڵ لە دڵ بەی بڵێی دوورە پێشمەرگەکەم
تۆ بە لوورەی با بانگم کە و منیش وە پای باران ئەگەم
Ey weten ba agirdanî zamarî ber baranîş bim
Ba qeyaxî helgerawî nîweşewî tofanîş bim
Le rêta agirêkim her dûkelawî mergim nîye
Beser kêwî daxa erom kize û tirsî cergim nîye
Swênd be nawit her pêşmerge taqanekey caranî tom
Her awêne hetawdîdey qeywanekey caranî tom
Lêt neşêwê rê peşêwê bilê meylî ewsay nîye
Helzinînê raçenînê tawê seday ewsay ewsay nîye
Le bîrit bê ey weten min afatî şer neybezandim
Wek espekey ba û boran bim hîç boranê neybezandim
Emêstakeş ey kurdistan swênd be befrî qendîleket
Swênd be nexmey alenexmey teyre mest û xoşxiwaneket
Her wek ewsa heta mirdin berdebazî rêgat ebim
bertelan û her perjînî berheywanî dergat ebim
Toş nekey na, dil le dil bey bilêy dûre pêşmergekem
To be lûrey ba bangim ke û minîş we pay baran egem
نەجمەدین غوڵامی