پاییز ئاماوە و دەردەداریی من
خەزانوو وەشی و دڵ ئازاریی من
هەواری چۆڵ و ئێنتزاری من
تەمە و سەرکەشا و خەفەتباریی من
وارە وارانوو بێقەراریی من
ترەکا هەناروو تاسەباریی من
خش خشوو گەڵای تاسێنێ خەیلێ
چەمێ جە تاسەو دیڎاری کەیلێ
جە سڵەوەو خەماو کەشوو بێمەیلێ
کەوت ڕا جە خەم جە هەرسا سەیلێ
بەش بەیۆ شنەی گوڵعوزاری من
ترەکا هەناروو تاسەباریی من
دەردی خەزانی خاس کاریێنێ
پەڕ جە خەنجەرێ زامداریێنێ
خەمێت عادەتێ ئێجباریێنێ
ئینە گرد وەشە بیماریێنێ
بۆ وینە ناڵەی وەفاداری من
ترەکا هەناروو تاسەباریی من
خەمت ئازیزا، چن خەم بەرکەرا
هەناسە! خەمێت تا کۆگەم بەرا؟
سەرەی بی سەوڎا ئاخر کەی سەرا؟
ژیوای دوور جە تۆ باخی بێبەرا
هەو ئازیز گوڵم! هەو نێگاری من
ترەکا هەناروو تاسەباریی من