سازی ناساز

بولبولی باڵشکاوی وەختی گوڵم
هەر شەپۆلان دەدا دڵی لە کوڵم
موغی بێ ئاگری شەوی یەڵدام
چاوەڕێی چارەنووسی ناپەیدام
کەوی بێدەنگی نەوبەهارانم
گوڵی بێڕەنگی چاو لە بارانم

کونجی جێژوانی چۆڵ و خامۆشم
سێبەری نازەنینی ڕەشپۆشم

کێلی گۆڕی شەهیدی گومناوم
تاکەداری کڕووزی بێ ئاوم
دەفتەری شیعری شاعیری ڕووتم
شەمی سەرگۆڕ و داری تابووتم
کونی گیراوی کۆنە شمشاڵم
خەونی ئاڵۆز و خاتیرەی تاڵم
کونجی جێژوانی چۆڵ و خامۆشم
سێبەری نازەنینی ڕەشپۆشم

چڵە ڕێحانی دوورە دێراوم
سازی ناسازی هەڵپەسێراوم
تکە ئاونگی سەر گەڵای زەردم
خەستە و دەردەداری چی دەردم

ئاخرین تیشکی خۆری پاییزم
شاعیری پیری توڕە و زیزم
چۆن دەتوانم بە تۆ بڵێم من چیم
خۆم گومانم هەیە کە هەم یا نیم

کێلی گۆڕی شەهیدی گومناوم
تاکەداری کڕووزی بێ ئاوم
دەفتەری شیعری شاعیری ڕووتم
شەمی سەرگۆڕ و داری تابووتم
کونی گیراوی کۆنە شمشاڵم
خەونی ئاڵۆز و خاتیرەی تاڵم