لادە لادە لادە
لەچکە تەسکە کەسکەکەت
یارە ژیکەڵانەکەم!
گوڵم!
بە هەر نیگایێ، مەوجی چاوە مەستە جوانەکەت
دەچێتە ناو دڵم!
هەر بە گوێی دڵم!
گوێ دەگرمە گرفە گرفی شیعرە ئاگرینەکەت
شیعرە ڕێک و پێکەکەی بە تاو و تینەکەت!
هەر بە چاوی دڵ دەڕوانمە دیمەنی ئەوینەکەت!
تۆ! ئەوینمی
ڕێک و پێکترینە شیعری ئێستا هەڵنەبەستراوی ژینمی!
تۆ! هەڵۆی خەیاڵی هەڵفڕینمی!
هەر دەکەومە سەر هەوا، بە هەڵفڕینەکەت!
بە جازیبەی ڕەوەندی تێپەڕینەکەت!
وە شیعری باڵی چەندە ڕەنگی تاوسی خەیاڵ
بە خوێندنەوەی سروودی مەرگی کۆرپە نازەنینەکەت
مەرگی کۆرپە نازەنینەکەت
لادە لادە لادە لادە...
لادە لادە لادە لەچکە تەسکە کەسکەکەت!
خۆشەویستەکەم! عەزیزەکەم! گەزیزەکەم!
تاقە ڕۆڵە جوانەمەرگەکەی بەهاری کورت!
ڕۆڵە خۆشەویستەکەی تەلان و کێو و چەم!
تۆ! هەزار ئایەتی، لە کانیاوی پڕ لە ئاو و خیزەکەم!
لە کاتی تونییایەتی
بە چەشنی بیری بەرزەفڕ، بێ سنوور و بێ نیهایەتی
تۆ! قیامەتی!
دڵستێن و دڵڕفێن و خەمڕەوێنمی!
تۆ! تەواونوێنی عەشقی پاک و خەمڕەوێنمی!
تۆ! پەل و نەمام ڕاوەشێنی باخی بادەهێنمی!
تێکەڵاوی گوشت و پێست و ئێسک و خوێنمی!
خوێنی خوێنەکەم!
هیچ وەبیرتە ئەودەمەی کە کەوتمە جەغزی کەسکە کەسکی چاوە مەستە کەسکەکانی
پڕ لە سیحر و جوانی تۆ؟
بوومە مەستی مەست و سێحری سێحری چاوە مەستەکانی تۆ؟
دەستی خۆم بڕی!
دەستی خۆم بڕی بە بەژنی باڵی شیعری ئاڵی تەمنیشانی تۆ
بۆیە کورتە دەستی ئەمن و خوێن دەبارێ هەر لە هەوری ئاسمانی مانی تۆ
جوانە بووکەکە!
جوانە بووکەکەم!
هەر هەنووکە دەمهەوێ کە بێمە جێی ژوانی تۆ
مەرگی کۆرپە نازەنینەکەت
لادە لادە لادە لادە...
لادە لادە لەچکە تەسکە کەسکەکەت!
ها ترووسکەکەم
جامی دڵ پڕی شەڕابی شەوقی شیعری شەو شەوە
بەو نیگایە پاکە مەندەیەت
وەسوەسەی دڵی پڕم هەلا هەلاکە، ببیە شیعرەکەم!
ببیە شیعرەکەم
تا کە ڕۆشنایی خاتە هەوری دڵ برووسکەکەت
تا ڕەها بی گوڵپەڕی خەیاڵی
تا ڕەها بی گوڵپەڕی خەیاڵی ناسکی
تاسکە تاسکی ئاسکی باسکی بسکەکەت
لادە لادە لادە...
لادە لەچکە تەسکە کەسکەکەت!