Minim jeneralî payîz
Minî hergîz oqrenedîw
Jeneralim jeneralî hezareha darî rût û
Milyareha gelay werîw
Minim jeneralî payîz
Kaskêtekey serim hewre û
Estêrekanî serşanim çend gelayek
Be rengî zîw
Paltoy berim kizebaye û
Şimşêrekem liqî dirextêkî rizîw
Minim jeneralî payîz
Dirextî rût em naznawey xelat kirdim
Minîş naznawî şehîdim da be gelay helweryû
Kirdime azîzim
Le yek sata xom korpey gelarêzan û
Her xoşim bawkî payîzim
Minim jeneralî payîz
Xwênêkî zerd be nêw demarma egerê û
Çawim her wek hewr nimnak
Tenya min bûm ke le tabûtî şûşeda
Çendîn gelam sipard be xak
Minim jeneralî payîz
Min bûm legel ziryanî bîrçûneweda
Kewtime ceng û zor gelam derhêna le çing
Min bûm şewî gelakanim
Xiste jêr balî tirîfe û wirşey gizing
Minim jeneralî payîz
Payîz be bê min hetîwe û
Min bûm witim belê termî nisêy sewze
Gelay werîwî koçkirdû
Tenya minim ke le mîhrabî payîza
Bo gyanî zîndûy gelakan
Nwêjî şehîd da’ebestim
Nawî nanêm nwêjî mirdû
Jêder: le xurbeta/ mihemmed ’umer ’usman/ çapî sêhem salî 2011/ dezgay çap û pexşî serdem