ئاخ پەی خەڵوەتێ بدیام وە بێ خەم
سیوای تۆ دیدم کەس نەدیام وە چەم
دڵ پەی دیدەنت کام خەڵوەت سازۆ؟
توی دیدەیچم بۆ مەردم نمازۆ
ڕۆشنی دیدەم سەرمایەی ژینم
مەزەی بەزم و کەیف دڵەی خەمینم
چریکەی سڕنا پریکەی خەندە
پەشێوی زوڵفان ڕیشەی دڵ کەندە
ئیشارەی وە ناز لەب خەندەی وە نەرم
نمانای خاڵان نەتۆیی پەردەی شەرم
سەرچۆپی وە ناز خۆل هۆردای دەسماڵ
بریقەی شیشە لەرەی لیمۆیی کاڵ
خودا وە تۆش دان باڵای عەرعەری
هەر لاێق وە تۆن شێوەی دڵبەری
کاڵاێ شیرینی وە باڵات بڕیان
تاس مەحبووبیت نە عاڵەم زڕیان
دیدەم ئینتیزار پا و پاڵای تۆشەن
وەگەرد پاڵای تۆ دڵ مەبۆ ڕەوشەن