نووری بادە

بە نووری بادە کەشفی زوڵمەتی تەقوا نەکەم، چی بکەم؟!
بە شەمعێکی وەها چاری شەوێکی وا نەکەم، چی بکەم؟!
لە خەزنەی دڵمدا هەرچی هەیە، هەر داغی سەودایە
دەسا ئەم نەقدە دەردی عیشقی پێ سەودا نەکەم، چی بکەم؟!
دەمێکە شاری پڕشۆری موحیببەت مات و خامۆشە
بە قانوونی تەجەننون شۆڕشێ ئینشا نەکەم، چی بکەم؟!
لە سەر تۆم دوژمنە دنیا، قەزییەم مانع الجمعە
کە تەرکی تۆ نەکەم، تەرکی هەموو عالەم نەکەم، چی بکەم؟!
بەجێ ماوم لە یاران، نابەجێ ماوم. ئەجەل، زوو بە!
بە مردن لەم قسووری ژینە ئیستیعفا نەکەم، چی بکەم؟!
ئەوا لەیلا بە ڕۆژی حەشر ئەدا وادەی لیقا مەحوی!
هەتا قامی قیامەت، ئاهـ و واوەیلا نەکەم، چی بکەم؟
هۆنراوە: #مەحوی