من کوڕێ خەم بیم لە خەم بیم پەیدا
خەم نافم بڕی خەم ناوم نیا
خەم چڕی لەلیم: ئەی چارەسیا
خەم خوەندە لە گووشم: تونی چارەسیا
چیمە شارێ خەم جفتی گا بەستم
بوودە خەروار خەم کەفتییەسە دەستم
چوارسەدی خەمە و پانسەد پەژارە
من وە کووڵ کیشم سۆب تا ئیوارە
جفتێ خەم کردم وە خەمینەوە
توخمێ خەم شەندم وە زەمینەوە
بیڵی لەو خەمە نامە بانێ شان
ئاویاری خەم کەم من وە دڵ و گیان
وەی وەی وەی فەلای شارێ خەم
هەر خوەم هەر خوەم
داسی لەو خەمە من ژەندمەوە
چەپچەپ لەو خەمە من کەندمەوە
تووڕی لە خوەم بی ماڵی لە مەردم
کیشەی خەمەگە من تەمام کەردم
چانی لە خوەم بی چانیاری لە مەردم
هووڵەی خەمەگەم من تەمام کردم
وەی وەی وە من وەی
شەنی لە خوەم بی شەنیاری مەردم
ماسیەی لەو خەمە جیاوە کەردم
تووڕی لە خوەم بی ماڵی لە مەردم
باری لەو خەمە پەی ئاسیاو بەردم
ئاسیاوم خەم بی ئاو ئاسیاوم خەم
پای ئاسیاوەگەم لە خەم بی مەحکەم
ئاردێ خەم بردم وینەی کووی زوخاڵ
بارێ خەم کردم ئاوردم وە ماڵ
نانی لەو خەمە نامە وەر داوان
ڕۊ کردم لە ڕۊ هەردەی بیاوان
خەم خورد و خەم خەو خەم تۆ برامی
هەر کوورە مەچم ڕەفیقێ ڕامی
نە چلەگیر بیم نە حەفتە مردم
ئەڕای خەمخواردن سەر گەورا کردم
یەدی، یەدی دی بەسە هەر تۆ خەم نەیری
خەڵک گشت خەمبارن تۆ خەوەر نەیری
ئای وای وای وای فەلای شارێ خەم
هەر خوەم هەر خوەم هەر خوەم
هۆنراوە: یەدوڵا ڕەحمانی