هەموو شتەکانیان پێیە ئێوە نەبێ
پووزەوانەی بێ قاچ و چاوەزاری شکاوی سەر دەرگای فیردەوسەکانیان بار کردووە
لەوێوە لە وڵاتی بیابانەوە دێنەوە دێنەوە دێنەوە دێنەوە ئێوەیان لەگەڵدا نین ئاخ
بە ناوی ئێوەوە مەملەکەتێک لە ژێر لمدا
میرنشینێکی بێ میر و بەبێ ڕایەن*؟؟؟
وڵاتێکی بێ ئاڵا و سروودی نیشتمانی ئا لەوێدا لەو سەحرایەدا*؟؟؟
قافڵەکانی لەوێوە لە مەملەکەتی لمەوە بۆ ئێرەی بێ ئاگر و ئێرەی بێ باران دێنەوە
قافڵەکان قافڵەکان
پڕن لە مێعراج و فانووس و داری عوود
پڕن لە نوقڵ و مێوژی شەوە پیرۆزەکانی ئێرە
شەوانی بەراتی ئێوە نەبێ گەڵا یادەکانیان بار کردووە
نووزە و هەنسکی ئێوە نەبێ هەموو تابلۆکانیان هەڵگرتووە
پۆرترێتی ڕووی مەلوولی ئێوە نەبێ
قافڵەکان قافڵەکان
هێندە بێ مروەتن کە دێنەوە
گەرمترین هەواڵی دنیایان پێیە
دواخەبەری ماڵئاوایی ئێوە نەبێ
ئێوە کە گەیشتنە ئەوێ هێشتاکە بۆنی ڕەیحانە و بۆنی مێخەکتان لێ دەهات
ئێوە کە گەیشتنە ئەوێ بیابان بە هاوارەکانی خۆی وت
سەرنجێ لەم گوڵە حەسرەتیانە بدەن دەڵێی تازە لە ناو بەهەشتەوە هاتوون
کە گەیشتن گۆرانیتان بیر چووبووەوە
بە ناو درزەکانی زەمیندا بە چرای حوزنەوە
بۆ قومێ خۆشەویستی
بۆ چنگێ هەوری سەبووری دەگەڕان
*؟؟؟= ئەو وشانەمان بۆ ساغ نەبووەتەوە، تکایە ئەگەر دەیزانن بۆمانی بنووسن
سپاس