ئێوارەیە و هێدی هێدی
زەردەپەڕی خۆری ماندووم ئاوا ئەبێ
لوتکەی بەرزی خەم داچۆڕا
نوقمی بزەی لێوی وشکی نیگا ئەبێ
ئێوارەیە و ئاگام لێیە
درەختە باڵابەرزەکان
چەقی ڕێگەیان گرتووە بۆ بینینمان بە پەرۆشن
گەڵای زەردی بێنازکەوتووی سەر شۆستەکان
جێ پێی هەنگاوی جارانمان دائەپۆشن
کە ئێواران ڕووی تەنیایی لە جادەکانی شار ئەنێم
دڵنیا بە
دڵنیا بە
بە تەنها بۆ تۆ ئەگەڕێم
ورد ئەڕوانم تیشکی سەرنج ئەهاوێژم بە هێمنی
ئاخر چی بکەم!؟
کوێ بگەڕێم!؟
تۆ هەر ونی
تۆ نەک دەریا
ئوقیانووسێکی بێ بنی
کە ئێواران ڕووی تەنیایی لە جادەکانی شار ئەنێم
دڵنیا بە
دڵنیا بە
بە تەنها بۆ تۆ ئەگەڕێم