فوغان یاران وەرن هاوار دە بنواڕن بۆ کردارم
لە پێشی کاروانی خەم وەکوو سەردار و سالارم
بڵێسەی مەجمەری سینەم بە وێنەی مەخمەری سوورە
وەکوو ئەسپەند و عود و سووتام کەسێ نەیپرسی هاوارم
خەمی کۆنم لە دڵ ناچێ خەمی نوێ دێتە سەر وەختم
دە ماڵی خەم بە ئاوا بێ کە هەردەم دێ بە هاوارم
پەشێوی چەرخی دەوران و شەمی بەزمی ڕەقیبانم
ڕەواڵەت ڕوون و ناودڵ ڕەش بە لەش ناخۆش و بیمارم
وەکوو کاتێ گەڵای زەردێ دەسی بەر بێ لەسەر دارێ
دڵم تەنگە لە تەنیایی نە هاوڕازێ نە خەمخوارێ
تەڕ دەبن ڕووی چیمەن و لێوی شکۆفەی جوانی دار
با منیش وەک شۆڕەبی سەر دانەوێنم بۆ بەهار
ئەی پەپوولەی شۆخی نەخشین پێ لەسەر گوڵ دامەنێ
وا وەرە نەک هەڵوەرێ خۆ ژینی دیکەی نادەنێ
چۆ لە داوێنی چیا ئەی گوڵ ئەگەر تۆ هەڵوەری
نایە کەس بۆ سەیری دارستان و سروەی سێبەری
لە تاریکی ژیانمدا لە سووچی سەردی زیندانا
بە مۆرەی نەردی ناکامی بەجارێ عومری خۆم دانا
بەڵێ ئەوساکە لاوێ بووم وەلێ ئێستا وەها پیرم
هەیە بە جارێ بەسەرهاتی خەمینی خۆم نییە بیرم
فوغان یاران وەرن هاوار دە بنواڕن بۆ کردارم
لە پێشی کاروانی خەم وەکوو سەردار و سالارم
بڵێسەی مەجمەری سینەم بە وێنەی مەخمەری سوورە
وەکوو ئەسپەند و عود و سووتام کەسێ نەیپرسی هاوارم
هۆنراوەی مەقام بە هەندێك گۆڕانکارییەوە: مامۆستا شەریف