حاڵی دەردی منی غەمبار بپرسە
ناڵەی شەوی گیانی بیمار بپرسە
هەموو دێن و لە ئەحواڵم ئەپرسن
دڵ و گیانم دە تۆش یەکجار بپرسە
لە جوانی تۆ ڕواوە گوڵ لە گوڵزار
باڵای ڕێکت تازە بەرهەم ئەدا دیار
لە تاوی ڕوومەتی وێنەی گوڵی تۆ
بولبول ئاسا ئەناڵێنم ئەکەم زار
دڵم بێ تۆ پەرێشانە شێواوە
کە ڕووی تۆم دی خەمم پەرش و بڵاوە
ئەگەر دەردی دڵم بەش کەم ئەزانی
دڵی بێ دەرد لە دنیادا نەماوە
تاڵ تاڵ پەرچەم بەسەر ڕووتا بڵاوە
گوڵ و ڕیحانە و سومبول تێکەڵاوە
بەسەر ڕووتا پەرێشانە دوو زوڵفت
بەهەر تاڵێک دڵێک هەڵواسراوە