یادی بەخێر

ئەو گوڵەی مەشهووری گشت عالەم بوو کوا یادی بەخێر
مەیلی وی دەرمانی دەردی من بوو کوا یادی بەخێر
چۆن دەبێ فکرت نەبێ تیرت لە جەرگم کارییە
ئەو دەمەی بوومە نیشانەی تیری تۆ، یادی بەخێر
بای شەماڵ بیدە بە دەست ئەو دولبەرە هاوارم
مەڵحەمێکم بۆ بنێرێ بۆ دڵەکەی زامدارم

من کە سەیدی تیری سەیادم نەما، سەیادی من
ئەو دەمەی تیرت لە جەرگی من دەدا، یادی بەخێر
ئەو کە دەیفەرموو وەفادارم بە شەرتی عاشقی
چۆن لە یادم چێ کەلام بوو خەندەکەی، یادی بەخێر
بای شەماڵ بیدە بەدەست ئەو دولبەرە هاوارم
مەڵحەمێکم بۆ بنێرێ بۆ دڵەکەی زامدارم

گەر بە خەمزەی چاوی مەستی وەک مەلی شیرین کەلام
مەرهەمی جەرگی منی دیاری دەکرد یادی بەخێر
چۆن بژیم بێ تۆ گولم ئەورۆ لە گولزارا نەبێ
گشتی هەبسی زیندانە بێ تۆ و خەمزەکەت یادی بەخێر
بای شەماڵ بیدە بەدەست ئەو دولبەرە هاوارم
مەڵحەمێکم بۆ بنێرێ بۆ دڵەکەی زامدارم