هەرچی جارێ ڕادەبری دەکوڵێ جەرگی بە خوێنم
وەک باڵداری بێ لانە تەرە و بێ سەر و شوێنم
تا مردن بیرم ناچی دڵداری خەمڕەوێنم
هاودەمی عەشقی تۆ بووم کەسی تر نادوێنم
ئەی مەڕۆ ئازیزەکەم بە تەنیا جێم مەهێڵە
لەسەر تۆ ئاوارە بووم و بەجێ ماوم لەو خێڵە
دین و دڵت لێ سەندووم بە زەبری چاو و ئەبرۆت
کەوتوومەتە هیلاکی و چەنێ بێباکی بۆخۆت
من بووم بە دیلی دەستت بەسرام بە زنجیر و کۆت
هەر گوناحێ کردوومە یاڕەبی بچێ بە ئەستۆت
ئەی مەڕۆ ئازیزەکەم بە تەنیا جێم مەهێڵە
لەسەر تۆ ئاوارە بووم و بەجێ ماوم لەو خێڵە
چەن ساڵێ خۆشم ویستی
بە ئاشکرا و نهێنی
پاوەن وە پا و بەڵێنی
قەول و قەرار وا بوو قەت دڵم نەڕەنجێنی
هیچ خوا لێت هەڵناگرێ عاشق هەڵخەڵەتێنی
ئەی مەڕۆ ئازیزەکەم بە تەنیا جێم مەهێڵە
لەسەر تۆ ئاوارە بووم و بەجێ ماوم لەو خێڵە
پەرچەمت کرژ و لوول کرد هێناتە سەر تەوێڵێ
تەفرەدانە تاکوو کەی بۆ لێم کەوتوویتە فێڵێ
برژانگت وەکوو نەشتەر پەردەی دڵم ئەکێڵێ
هێشتا هەر دەس بە دوعام کە خوا تۆم بۆ بهێڵێ
ئەی مەڕۆ ئازیزەکەم بە تەنیا جێم مەهێڵە
لەسەر تۆ ئاوارە بووم و بەجێ ماوم لەو خێڵە
عەشقت وەک کۆت و زنجیر چووەتە هەردوو پێمەوە
بووی بە سێبەر و سایە بە سەر جێگە و ڕێمەوە
ویستم جێت بێڵم بڕۆم بۆخۆم سەر بنێمەوە
ئولفەتم پێوە گرتووی هەر بۆ لای تۆ دێمەوە
ئەی مەڕۆ ئازیزەکەم بە تەنیا جێم مەهێڵە
لەسەر تۆ ئاوارە بووم و بەجێ ماوم لەو خێڵە