هەستە با بچین بکەین تەماشا
لە مێرغوزار و لای باخچەیی پاشا
سەیر کە نەسرین و وەنەوشە و گوڵزار
بولبول ئەخوێنێ ئەم دار بۆ ئەو دار
چاوێک بگێڕ لە مێرغوزارد
خەمی دەروونت بدە بە بادا
غەم و هەم و تەم لە دڵت دەر کە
ئەمڕۆ دنیایە سبحەینێ مەرگە
هەستە گوێ بدە نەغمەی موسیقا
لەم دوو سێ ڕۆژەی دنیای بێ بەقا
کەمان و عوود و قانوون و گیتار
بۆت ئەڵێن قەتار لەگەڵ نەی و تار
سازە سەنتوورە گوێ بدەرە نەوا
تەموورە و تەموور بدە بە ئاوا
گەر گوێ لە سەبا و ڕاستێ بگری
بۆ حاڵی عاشق زووتر ئەگری