من لە فرمێسکی وەریوی نیوەشەو تەنیاترم
هەرچی تەنیایی لە دنیادایە لەو تەنیاترم
بێ تریفە و سارد و لاوازم لە سەر هەڵدێری شەو
من لە کاتی خۆرنشینی مانگی نەو تەنیاترم
هێند لە سووچی کۆنەگیرفانی ژیانا مامەوە
زۆر لە پووڵێکی دڕاوی بێ برەو تەنیاترم
دڵڕەشی چنگی لە قوڕگم ناوە دەنگیش هەڵبڕم
وام لە توولەی وشکی سەردەمدا، لە کەو تەنیاترم
وشکەباوەڕ گرتی وەک ژەنگ و کەڕوو مێشکی زەمان
بۆیە ئەمڕۆ من لە مردووی گۆڕی خەو تەنیاترم
ئەشقی ئەم شاخانە بوو ڕیشەی پتەو کردم، دەنا
من لە پووشی بەر دەمی با بێ وزە و تەنیاترم