ئەشێ تاریکی و تیشکی خۆر بەیەک بگەن
ئەشێ زەوی و سینەی ئاسمان بەیەک بگەن
ئەشێ قوتبی سەروو و خوارووش بەیەک بگەن
بەڵام هەرگیز ناشێ من و خۆشەویستم بەیەک بگەین
ئەشێ ئەهریمەن بەهەشتی خوای بەرکەوێ
ئەشێ ڕووبار ڕوو لە هەوراز بێ و سەرکەوێ
ئەشێ مەم زیندوو بێتەوە و لەسەر سینگی مەم بسرەوێ
بەڵام ناشێ جارێک تر منی دڵدار بگەم بەوەی خۆشم ئەوێ
ڕەنگە کچە دراوسێکەم
یا ئەو کچەی ئەمڕۆ، سبەی
ئەڵقەی من ئەکاتە پەنجەی
وا تێبگا
پەلکەزێرینەی هۆنراوە بۆ کەمەرەی ئەو ڕێک ئەخەم
بۆ ئەو تۆقەی زێڕینی خۆر
لە پرچی ڕەشی شەو ئەدەم
نەیزانیوە هۆنراوەی من بۆ کەسێکە
کاسە خۆشاوێک بوو، ڕژا
چەپکێک بۆن بوو
بە نوێنی کەسێکی ترا هەڵپژا