نا مەچۆ، جوانێ مەچۆ، واوە مەچۆ؟
تۆ فریوی زێڕ و زێوی وان مەخۆ
ئەو هەوەسبازانە جێی متمانە نین
هەر دەزانن گوڵچنین و بەیڕنین
وا وەرە دەی وا وەرە نێزیک بە لێم
بمدەیە مەی بمدەیە مەی تا دەڵێم
گوێم دەیە ئەی دیدەمەستی قیت و قۆز
تا بناڵێنم وەکوو بلوێر بەسۆز
نابێ قەت ناڵەی جودایی بێ ئەسەر
جا چ نەی بیکا چ پیاوی دەربەدەر
نابینم خاک و وڵات و شاری خۆم
نابینم جێژوان و کەونە لانی خۆم
چۆن نەناڵێ ئەو دڵە ئەنگاوتەیە؟
بەرد لە بەردی بێتەوە دەنگی هەیە