ژوورم تەنیا و دنیای بەر پەنجەرەی ژوور
بە چواردەوری باخچەی کۆشکا، هەتا دوور
دارستانی سەروە و سنەوبەری سەوز
شەو ڕووناکە و چاوم یاخی لە وەنەوز
ئەی بولبولی شەبەقی شەو! بخوێنە
هەستی جوانی پەرستیم بورووژێنە
با بە زەبری مەستیم بە ئاوازەی نوێت!
وێڵی دارستان بم کاتێک: خەڵک ئەنوێت!
ئەگەر عەشقی هونەر، وەک تۆ، ئەی بولبول!
لەناو ڕەگما لەگەڵ خوێنا بدا پل
منیش وەک تۆ، خەوم ئەخەمە ژێر پێم
دێم بە چڕی دارستانا ئەگەڕێم
ئەشێلم گیای بن داری نوقمی ئاونگ
بای دارستان لەرزێن ئەمژم پڕبەسنگ
بە شەپۆلی گەڵای سەوزا کە ڕوانیم
سۆزی لەرەی نوێ ئەچێتە گۆرانیم
وەک شووشەی عەتر وشەکانی هەڵبەستم
ئەگرن بۆنی گوڵی لەیلاخی دەستم
ئەگەر عەشقی هونەر، وەک تۆ، ئەی بولبول!
لەناو ڕەگما لەگەڵ خوێنا بدا پل
منیش وەک تۆ، خەوم ئەخەمە ژێر پێم
دێم بە چڕی دارستانا ئەگەڕێم
ژوورم تەنیا و دنیای بەر پەنجەرەی ژوور
بە چواردەوری باخچەی کۆشکا، هەتا دوور
دارستانی سەروە و سنەوبەری سەوز
شەو ڕووناکە و چاوم یاخی لە وەنەوز