کە دیم ئالۆزە چاوی، زوو وتم: ئەم فیتنە هەڵبەستە
وتی: جاران ئەتۆ ئەتوت بە من: کەم فیتنە هەڵ بەستە
بە سووتن چم، گلەم نەبووە لە دەردی سەردی میهری تۆ
من و شکات؟*؟ وتی: گوێ ناگرم لەم فیتنە هەڵبەستە
بە غەیرەز شوکر، ئەگەر شکات* لە جەوری تۆ بکەم* ، سپڵەم
وتی: حاشا، ئەزانم ئەم ڕەقیبەم فیتنە هەڵبەستە
بە جێیە کوشتنم، سووتاندنم، خاکت بە با بۆ دام؟!
وتی: ئاهەنگی عیشقی من مەقاماتە لەگەڵ بەستە
بە زوڵفیدا هەڵاوەسرابوو دڵ عومرێ* بە سەد ئامال
نیگاهی وەک ئەجەل هات و وتی توولی ئەمەل بەستە
قەزا بێ دەستەڵاتت کا، چیە غەیری ڕەزا چارە؟
لە بەر دەستی جەلادا ڕێویێکە شێری پەلبەستە
بە خۆ کوشتن نەجاتی خۆ بدە مەحوی وەکوو فەرهاد
لە زۆریی قەهرەمانی عیشق، هەر ئەجەل بەستە