لێم زیزە لێم زیزە چاوجوانم

شێوەزار: سۆرانی

287

ماڵە بابم بێوەفا
سەبرم نەما تا کەی جەفا
سینگی باغی با سەفا
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

دەردی عیشقم کارییە
وا خوێن لە چاوم جارییە
من بەشم غەمبارییە
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

ئەی گوڵم ئەی لالەڕوو
ئەی بولبولی دێوانەخوو
بێ سەبەب شەیدا نەبوو
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

ناڵەیی عیشقە بەشم
من عاشقی چاوی ڕەشم
زیزە یاری مەهوەشم
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

تاڵە بێ تۆ ژینی من
توخدا وەرە سەر دینی من
مەڵحەمی کە برینی من
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

شێتی تەنیا خاڵەکەم
خاپوورە بێ تۆ ماڵەکەم
دولبەری چاوکاڵەکەم
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

مەیلی تۆ لوقمانمە
ژینت هەناسەی گیانمە
خەندەکەت دەرمانمە
لێم زیزە لێم زیزە چاوجوانم
گەوهەری یەک دانەیە
دەم قەند و ڕوو ماهی تابانم

ئەم گۆرانییە لە ساڵی ١٩٦٥ی زایینی لە بەشی ئازەریی ڕادیۆ تاران تۆمار کراوە و مامۆستایان حەسەن زیرەک، مەلا حوسێن عەبدوڵڵازادە و هاشمی فیدایی لە خوێندنی کۆرسی ئەم گۆرانییەدا بەشدارییان کردووە.
بە گوێرەی سەرچاوەکان لە سەفەرێکی مامۆستایان ماملێ و عەبدوڵڵازادە بۆ تاران، ئەو دوو بەڕێزە دەبنە میوانی ماڵی مامۆستا حەسەن زیرەک کە لەو کاتەدا لە بەشی کوردیی ڕادیۆ تاران لەگەڵ میدیا زەندیی هاوژینی خەریکی ئیش بوونە و بە هەولی مامۆستا زیرەک چەند گۆرانییەک بە هاوکاریی ئۆرکێسترای ئازەریی ڕادیۆ تاران تۆمار دەکەن کە بریتین لە:
-'هەستە با بڕۆینە داوەتێ' بە دەنگی مامۆستا مەلا حوسێن.
-'ڕێبوار و ڕێبوار' بە دەنگی مامۆستا زیرەک.
- 'بەرهەڵبێنە'، 'مەگری مەگری'، 'ماڵە بابم بێ وەفا'، 'گۆوەندە زەماوەندە' و هەروەها 'بە هەوران پاییزە (لەبەر نازی تۆ)' بە دەنگی مامۆستا محەمەدی ماملێ.
یاد و ناویان هەرمان