دەمەوێ بچمە ئاسمان لەوێ ببم بە ڕێگر
شادییەکت بۆ بدزم هەتا سەر گەش و نەمر
گەورە مەبە کزەی جەرگم
گەورە مەبە
تا من مابم لە مناڵیت وەڕەس نابم
ئەگەر وەڕەس بووی پێم بڵێ
خانووچکەی شووشەت بۆ دەکەم
ئەگەر برسی بووی پێم بڵێ
چنگۆڵانت پڕ باسووق و گەزۆ دەکەم
گەورە مەبە کزەی جەرگم
گەورە مەبە
تا من مابم لە مناڵیت وەڕەس نابم
شەو ساماڵ بێ
وەک تۆ دێمە بەر پەنجەرە
ئەستێرەی ئاسمان دەبژێرم
کە بارانیش دەئاخوێ*
بە کڕوکپیت دەسپێرم
گەورە مەبە کزەی جەرگم
گەورە مەبە
تا من مابم لە مناڵیت وەڕەس نابم
هەموو شەوێ بە کەژاوەی
هەقایەتی مەم و زین و شێعری هێمن*
خۆم بۆ خەوت بە بووک ئەبەم
کە نووستیشی مۆر لە دەمی سروشت ئەدەم
گەورە مەبە کزەی جەرگم
گەورە مەبە
تا من مابم لە مناڵیت وەڕەس نابم
هەموو شەوێ شقارتەیێک لە منەوە
دەنک دەنک داگیرسێنە
تیشک و پرشەی چراخانی لێ بستێنە
گەرموگوڕیی ئاتەشگەدەی زەردەشتییانی لێ بستێنە
گەورە مەبە کزەی جەرگم
گەورە مەبە
تا من مابم لە مناڵیت وەڕەس نابم