ساتێ وا هەڵکەوت گوزارەم کەوتمە ماڵی لەیلەوە
ئەم دڵەی کەیلم کە دەیناڵاند بە تاسەی مەیلەوە
شۆخی نازدار هات بە ناز و عیشوە چاوی هەڵبڕی
گەردی خەم نیشتبوو لەسەر سەفحەی دڵی کەیلم سڕی
دەستی هێنا نایە ناو دەستم بە غەمزە و نازەوە
کوڵمی هێنا ماچی کەم جا پێی وتم مەیگازەوە
چونکە جارێکی لە جێژوان کوڵمەکانیم گەستبوو
ترسی ئەو جارەم لە دڵیا چونکە نەخشی بەستبوو
بۆ ئەوەی یارم نەترسێ تاکوو بێتە بەزمی حاڵ
بۆ ئەوەی تاکوو نەشێوێ شەقڵی ڕوومەت، ڕیزی خاڵ
زۆر بە ئەسپایی دەمم برد نامە سەر کوڵمانی لێو
ئەو دەمەی دەستی بزێوم برد و گرتم جووتە سێو
گوڵ بزەی هاتێ وەدەر کەوتن لە من لەعلی دەمی
چۆڵەکەی دڵ چەشنی دیلێ کەوتە داوی پەرچەمی
عەقڵ و هۆشمان لا نەمابوو هەر دوو بێهۆش پێکەوە
ماوەیەک کەم تێپەڕی من ڕاپەڕیم زانیم خەوە
هەر دوو ئەژنۆم گرتە باوەش تا بەیانی ئەو شەوە
ئێستەکانێش هەر بە تاسەم گوڵ گوزاری بێتەوە
تا لە سێبەر پەرچەمی ئەو شوانە دانیشێ دەمێ
بۆنی خۆشی پرچی یارم بۆم ببێتە مەرهەمێ
یەک دەم نەبوو ئەو دڵبەڕە بێڕەحمە وەفا کا
جارێک نەبوو ئەو کافرە شەرمێ لە خودا کا
حەیرانن ئەتببا لە عەلاجی مەرەزی من
لوقمانی موژانت...*