مەکەن مەنعی عاشقان، عیشق کاری دژوارە
هەرکەس عیشقی لە دڵ بێ، بێسەبر و بێقەرارە
دایمە لەبەر هیجرانێ، ڕەنگ زەرد و لێو بەبارە
لە عیشقێدا سووتاوم، غەمم لە چوارکەنارە
مزگێنی بێ لە یاران، دەڵێن ئەوڕۆ بەهارە
گەلێ دەردان سەر لێدان، ساتێک ناگرم قەرارێ
شەو و ڕۆژێ ناسەبرم، لەبەر غەمی دەیارێ
دڵێ من چەند مەحزوونە، ئەسرینم دێنە خوارێ
مەگەر بەوەی ساکین بێ، ئاخ بە ڕەنگی دە بەهارێ
بەهارم چەندە خۆشە، مزگێنی بێ هات بەهار
هاتن تەیری دە ڕەنگین، جووتبەجووت بوون بە قەتار
کەوتن لە دەم دەراوان، لەوانم دیت سەت هەزار
ئەو بەهارەی وا ڕەنگین، لێم بووە بە بازاڕ و شار
غەمی لە دڵی من زۆرن، با بچن لەگەڵ زستانێ
هەوری دەڕەش دەخرۆشن، دەگرن بەری ئاسمانێ
لەبەر گوڕەی شەماڵی و لە ڕێژنەی دەبارانێ
کوێستان ماون دەتەمێ، هەوەڵ مانگی نیسانێ
ڕەببی خودا شادمان کەی، ئاخ بە دوو چاوی دەجوانێ
هەوری ڕەشی تاری کرد، دامێنی کۆساران
لەو بەهارەی سەوزەپۆش، لە شکۆفەی دەداران
بە زەرد و سوور خەمڵیون، گوڵان لە چوار کەناران
وەنەوشەم زۆر زەعیف دین، ئاخ لە دەم جۆ و جۆباران