سەرهلدە ژ خەو ئەی کوردۆ رۆژ هاتە دەلاڤا
تامارا خەوێ گرتیە ما سەر هەردوو چاڤا
کێلەک ل تە هشک بوونە ل سەر مەرش و کولاڤا
سەرما چوو نەما دەنگێ برووسک و ئەور و تاڤا
مارمارا می و بەرخا بوهار هاتیە چۆگا
د چرووسن کولیلک ڤێگا ب شەبنەم و خوناڤا
خەملا خوە گرێدایە زەمینێ ب کولیلکا
بهن و بەخێ داڤێژە وەکی مسک و گولاڤا
رابە بەر ب ژینێ ڤە بەلەنگازۆ دو گاڤا
تێ خوردە هەری ژارۆ ل بەر پێلێن د ئاڤا
سەرما چوو نەما دەنگێ برووسک و ئەور و تاڤا
سەیدا تە نەما تێ دەست ب نێچیر و ب راڤا
شێرینە وەلات تاجەکە زێرینە برادەر
نەفرۆشە ب ئەرزانی ب دینار و دەراڤا
گۆڤەندەکە چارگۆشە ل مەیدانێ ل دار خە
دا دەنگ بدە گولستان ب مزگین و سلاڤا