دەردی وە ماڵێ ئاسمان

یەی کەڵ مەسێگ ها شارمان
بەرزە چەنە چنارەگان
چەوی ڕەژن وە میل گیان
ناوی چڕن وە خوار و بان
یەکی یەکی و دووان دووان
دەردی وە ماڵێ ئاسمان
دەنگێ بەرزێ هریکەگەی
شەقەی خوەشێ نازێ خەنەی
تا وەو دەم قەشەنگەو تییەی
خەیدەمە هۊر باخێ بەی
ئەی چەو کەو خوەش سەر زوان
دەردی وە ماڵێ ئاسمان

وەختێ کە سەروین نەیدە سەر
یا سەڵتە و زونێ کەیدە وەر
یا شاڵ بەسیدە قەی کەمەر
هەر تانە دەیدە مانگ و خوەر
ناوی چڕن وە کەشکەشان
دەردی وە ماڵێ ئاسمان
ئی کەڵ مەسە وینەی نییە
تا گەر کەفێدەو ئی ڕییە
چمان فریشتەیگ هاتییە
داخم کەسیگ لەلی دییە؟
زڕەی خەو لە چەوم پەڕان
دەردی وە ماڵێ ئاسمان

نامێ خودا بکەن ئەڕای
هەرچی گدارە ها لە سای
خوەریش شەوانە ها لە لای
زەمین خوەی خەیدە ژیرێ پای
ئەی شووخ و شەنگێ چەو جوان
دەردی وە ماڵێ ئاسمان