دە پێم بڵێ تۆ چۆن عاشقی کەسێ ئەبی کە نەیناسی
چۆن سەرنجت بە ڕوخساری نامۆییما هەڵەواسی
لە دوورەوە کوورەی هەستت شوعلەیێکی بە تین ئەدا
بە چاوی من عاشق مەبە کەم لە دەرگای ئەوین ئەدا
من هۆگری عەشقت نابم چونکە دڵم ماڵی ژانە
لە سەرمایەی خۆشەویستی تەنیا بەشم دابڕانە
دە تۆش بڕۆ بۆ لای یەکێ کە بیر لە خەم نەکاتەوە
دنیا بار کا باکی نەبێ ئاوڕ لە کەس نەداتەوە
من ناتوانم لەم شارەدا لوتکەی تەلار بەرمە ئاسمان
خۆشەویستی ئەمڕۆ بۆتە فڕین بەرەو چاوگەی سامان
منیش خوانی عەشقێکی تر بۆ هیچ کەسێک ناکەمەوە
ئیتر دڵی هیچ ڕێبوارێ بۆ ماڵ دڵ نابەمەوە