Çengîz Sîgarçî
چاوەڕێی موژدەی نەسیمم تا لە گوڵشەن دێتەوە بەڵکە فەرمایش بکا گوڵ، بولبولم با بێتەوە میروەحەی زولفت لە دەوری ئاوری ڕووت بێ، چلۆن ئاگری عیشقت بە ئاوی چاوی من دەکووژێتەوە؟ سوچی زولفت بوو کە پەروانەی دڵم ڕووی کردە ڕووت ئاگری وەسڵی شەم و پەروانە شەو دەکڕێتەوە دڵ لە ترسی چاوی بوو ڕووی کردە مێحرابی برۆی ئێستە بیستوومە لە چینی زولف جێی نابێتەوە کێوی هیجرت خستە سەر شان و دڵم پێی خستووە تا نەگا دەستی بە زولفت زەحمەتە هەستێتەوە سەد کەڕەت خستمتە گێژ و مەهلەکەی بەحری فیراق ئاخری قوللابی موژگانت دەرم دێنێتەوە دڵ ئەوا کەوتۆتە زیندانی خەمت قوربانتم تایەکی زولفت بنێرە بەڵکە بۆم دەربێتەوە تۆ خودا تاکەی لە تاریکی شەوی هیجرانی تۆ دەستەوئەژنۆ دابنیشم، ڕەببی کەی ڕۆژ بێتەوە بێ ئیشارەی حیکمەتولعەینی شیفات نایێ شیفام خۆت ئەزانی زامی دووری سەختە خۆش نابێتەوە فکری من چونکە دەقیقی عاشقی قەددی ئەوە موو لە موو گیراوە چبکەم لێک جوێ نابێتەوە
Çawerêy mujdey nesîmim ta le gulşen dêtewe Belke fermayş bika gul, bulbulim ba bêtewe Mîrwehey zulifit le dewrî awrî rût bê, çilon Agirî ’îşqit be awî çawî min dekûjêtewe? Suçî zulifit bû ke perwaney dilim rûy kirde rût Agirî weslî şem û perwane şew dekrêtewe Dil le tirsî çawî bû rûy kirde mêhrabî biroy Êste bîstûme le çînî zulf cêy nabêtewe Kêwî hîcirit xiste ser şan û dilim pêy xistuwe Ta nega destî be zulifit zehmete hestêtewe Sed keret xistimte gêj û mehlekey behrî fîraq Axrî qullabî mujganit derim dênêtewe Dil ewa kewtote zîndanî xemit qurbantim Tayekî zulifit binêre belke bom derbêtewe To xuda takey le tarîkî şewî hîcranî to Destew’ejno dabnîşim, rebbî key roj bêtewe Bê îşarey hîkmetul’eynî şîfat nayê şîfam Xot ezanî zamî dûrî sexte xoş nabêtewe Fikirî min çunke deqîqî ’aşiqî qeddî ewe Mû le mû gîrawe çibkem lêk cwê nabêtewe