هاوار هاوار یاران بەرن هاوارم
دەستی شکاوم لە من تۆراوە یارم
ئەوساڵ بۆم نایە خۆزگەم سەد جار بە پارم
وەرە با ئاشت بینەوە کوڵی دڵەکەم
هەر تۆی گوڵەکەم بێ تۆ هەڵناکەم
نە جێژنەم وەکوو گیانە جێژنەدارانە
نە دۆستم وەکوو یاران دۆستی جارانە
من لێرە ماوم گیانە یار لە شارانە
وەرە با ئاشت بینەوە کوڵی دڵەکەم
هەر تۆی گوڵەکەم بێ تۆ هەڵناکەم
ڕەشە بەختم هەر وەک خاڵی جوانان
لەسەر چی یاری من دەگرێ بەهانان
دڵ و دینم لەسەر لێوئاڵێ دانان
وەرە با ئاشت بینەوە کوڵی دڵەکەم
هەر تۆی گوڵەکەم بێ تۆ هەڵناکەم
کە یار بێ مەیل بێ گیانە مەعلوومە حاڵم
لەوەی ڕەشتر گیانە نەدیون تاڵم
ساتێک ناسرەوێ بێ تۆ ئەو دڵی زاڵم
وەرە با ئاشت بینەوە کوڵی دڵەکەم
هەر تۆی گوڵەکەم بێ تۆ هەڵناکەم
غەمزەدەی زولفم بە غەمزەی چاوی حەیرانم دەکا
بەستەیی داوم خەدەنگی تیرەبارانم دەکا
عاشقی زارم لەسەر هیچ ئەو نیگارە دەمکوژێ
تیفلی نادانم لەسەر ماچێ لە گریانم دەکا
داعیەی ئاوێنە دینی کوفرە نەک ڕوحمێکی بێ
حەقیەتی بەو چاوە کاڵانە کە تاڵانم دەکا
یاری من هەرگیز لە قەتڵی عاشقی پەروای نییە
چونکە ڕوومەت شەمعە بۆیە حەز بە سووتانم دەکا
ئاو لە چاوانم لەبەر زولف و عیزارت دێنە خوار
دووکەڵی ئەو مەجمەرە هەردەم لە گریانم دەکا
من دەڵێم: یاقووت و ڕەیحان خەتتی کامیان خۆشترە؟
ئەو بە عەییاری ئیشارەی لەعلی خەندانم دەکا
ڕوو لە ئەبرۆی تۆم دەکا چاوت بە موژگانی کەچی
قیبلە نیشانم دەدا، کافر موسوڵمانم دەکا!
پێم دەڵێ: بگری وەفایی گەر ئەسیری لێومی
یەعنی مرواریم دەوێ، چی نرخی مەرجانم دەکا؟!
یارم ڕەش ئەسمەرە لە من تۆراوە
نازانم لەسەر چی دڵی ئێشاوە
نامەی بۆ دەنێرم بەدەم شەوباوە
وەرە با ئاشت بینەوە کوڵی دڵەکەم
هەر تۆی گوڵەکەم بێ تۆ هەڵناکەم
دەستەوئەژنۆ دانیشتووم لە سوێی یارێ
بای شەماڵ لە کوێیە بەرێ هاوارێ
گەرچی ئاه و ناڵەم لێی ناکا کارێ
وەرە با ئاشت بینەوە کوڵی دڵەکەم
هەر تۆی گوڵەکەم بێ تۆ هەڵناکەم